پشاور: بڈھ بیر میں سی ٹی ڈی کی کارروائی، 4 دہشت گرد ہلاک
پشاور کے علاقے بڈھ بیر میں محکمہ انسداد دہشت گردی کی کارروائی کے دوران کالعدم تنظیم فتنۃ الخوارج کے 4 دہشت گرد ہلاک ہوگئے۔
سی ٹی ڈی کے مطابق ہلاک دہشت گردوں میں تنظیم کا کمانڈر طاہر عرف معاویہ بھی شامل ہے، جو اپنے ساتھیوں کے ہمراہ علاقے میں گشت کر رہا تھا۔ اطلاع ملنے پر سی ٹی ڈی نے کارروائی کی۔
حکام کے مطابق ہلاک دہشت گردوں کے قبضے سے 3 کلاشنکوفیں، ایک پستول، دستی بم اور متعدد کارتوس برآمد ہوئے، جبکہ دہشت گردوں کے زیر استعمال 2 موٹر سائیکلیں بھی قبضے میں لے لی گئیں۔
سی ٹی ڈی کے مطابق ہلاک دہشت گردوں میں سے ایک کی جیب سے افغان شناختی کارڈ بھی ملا، جس کے مطابق اس کا تعلق افغانستان کے صوبے کنڑ سے تھا۔
حکام کا کہنا ہے کہ دیگر ہلاک دہشت گردوں کی شناخت کا عمل جاری ہے۔